Os fora camp:

“La seguente scenetta è tratta da una storia vera. Qualsiasi riferimento a fatti e persone NON è puramente casuale. Si sconsiglia la visione ad un pubblico di politici e amministratori impressionabili. Leggere attentamente le avvertenze, le modalità d'uso e il nome delle ditte non più esistenti contenute nel piano di emergenza comunale. Potrebbe indurre effetti lassativi.”

Trei tosat i é belche ntel car “Ostaria da Ciana” e i parla di argoment per el car de chei da Le Vile per Vecia Popa 2019.

Davide: E nsoma no ghe vegnon fora con nia st an per Vecia Popa… Ti Manuel, no te pensetu a valch?

Manuel: E no sarà mo valch contra chei Tech¹ dai!

Alex: Ncora con sti Tech?!? No sié stuf assei? No ve sié stomegai dopo tuti sti ani?!? Ghe ol valch de nof, ma no savarèe che po…

Davide: Vardé, ncoi no ghe la fae propio a me fa vegnì en tema te sto zervel… Oh, me son pensà: “Elezioni comunali 2019”.

Manuel: Per l amor de dio, no ston intrigasse inte te i afar de la politica!

Davide: Ades, come che se no l avissione mai fat…

Alex: Eh ma scolté mo tosat: inveze che parlà ncora de politica e Tech, no se pol descore de valch de important come del Palaghiaccio che l é serà belche da n toch?

Manuel: Per forza i lo à serà, co l era vèrt no ndea nissuni e ades zenza strada i ndarie ncora de manco!

Spandesta desperazion.

I ven inte te sèna Giacomo e Liam, vardan interessai en telefonin. L Liam l descor al Giacomo.

Liam: Varamo cua! Cua l era per ndà inte nte la mè taverna!

Davide: Ah sieo rivai po? A la bonora eh… Dovaié esse cua meda ora fa!

Giacomo: Eh ostu che?.. Se sion pers en cin ia... e pò son stat ciapà da sti video del Liam!

Manuel: Alora?! Poche s-cione e déne na man che sion in dificoltà!

I tardivoi i se senta, e chei altri i rugna percheche no ghe ven in ment nia. L Liam l slonga de scondion l telefonin al Giacomo.

Alex: Oh, ma sieo ncora là con chel telefonin mo? Elo che po de cossita interessant? Féne vede anca noi!

Davide e Manuel: Sì sì, tiré cua!

L Liam l mostra.

Liam: Si si, vardé cua... chesta la é casa mea calche mes fa… ve recordeo voi l aluvion?

Alex: Eh come desmentegassela?... Aon laorà tuta not...

Davide: Ma… voi no me l aé pi contada come che la era stada! Mi v è dit, ere do a Padoa a l università, e blocà là saee poch e nia...

Giacomo: Per forza, i telefoni no i ndea, Internet manco che manco, la corente no se l à pi vista... tasi che l acua la é mancada per poch!

Manuel: Podion savé le notizie solche dal passaparola!L era come esse tornai al temp de la guera!

Davide: Si si, va ben, ma chest el saee anca mi mi! È tant proà a ciamà, ma nissuni che me respondea… Me son passade sot i oci cotante de chele foto, ma sessaben, en cont l é le vede da drio l telefonin e n cont l é sentì chel che l era suzedest da la dent che l era colà co stivai e badil!

I scomenzia i moviment sun el car “Val dei Font²”, i ator i taca a se move (co scoe, badii, etc).

L Giacomo l se alza su per descore, i taca i son de sotfont (de acua che cor, crodoi che sbat, vent)

L acua del car movesta da la pompa la scomenzia a core e vegnì fora dal pissàndol.

Giacomo: Inte a Tócol, là onde che l é la strada che ven do dai Font, l acua la avea menà en grumon de giara e crodoi…

Manuel: I era en 20 col badil che ghe fea strada a l acua, parcheche no la ndesse inte par le càneve!

E anca da la brenta in do i era là che i ghe tendea! Fursi no sion drio a se rende cont, ma le canesele e le burele de Tócol le era deventade en ru!

Alex: Pensete che su la Campregana³, davant a casa toa, l era cascà un de chi alber marzi e straveci! E l s avea poià propio su la linea de la corente! Tasi che to pare l à avest el coraio de montà su su la bena de na pachera, in pie co la motosiega a taià ia i ram che co chel vent i avarae de segur tirà do anca l pilon!

Davide: Ah me pare? Propio da Spisal⁴!

Alex: L era chi che ghe fea luce e l era anca n pompier pena sot de el, che ghe disea onde taià! Che pò tut sto laoro per n alber che i podea poben pensasse de taià co l era ncora san!

Giacomo: Na bena? Eh anca inte da mi a Tócol per grazia l é passà un col trator e na bena tacada e l à scomenzià a ingrumà su tut el material de la prima boa, e pò l é scampà ia. No saon encora chi che fusse ma tocon solche rengrazialo!

[Flashback 1] I tosat i tas e i taca a parlà i ator del car “Val dei Font”; i ator, nta mez a la strada, i smof el material cossita da fà doi parade de giara e crot che le fae core l acua de la brentana a val.

Piodeghèr1, Daniel: Ma fenirala mai po sta piova?

Piodeghèr2, Marco: Eh speron! No te sent che l é drio a se levà su anca l vent?!

Piodeghèr3, Anna: Ciàmelo vent... l é i cop che sgola ia, varda là! Ociu a no ciapàtelo inveze!

Piodeghèr1, Daniel: Ma in Comun aveo ciamà? Erelo calchidun?!

Tuti: Booohhh”

L passa l Patrick sosia-Tecia⁵ co “tuta anfibia professionale” sun la “fat bike” zigan:

- Oh sta tuta! Come che la cen la piova, come che la cen la piova!”

Piodeghèr2, Marco: El sìndico elo onde? L aveo vist?

Sponta fora el sindico Sisto coi pompier che i lo cen per le spale, per i braz.

Sindico Sisto Da Roit: Aiuto! Sono trattenuto dai pompieri!

Tuti i piodeghér i improvisea batude e parole endana che i laora.

I riva i “volontari veneti” de la Protezion Zivila e i comentea:

Veneto1, Patrizia: Ostregheta! Cossa che ghe xé sucesso? Areo qua el torente dove che xe rivà!

Veneti n còr: “Ciò, 'ndemo a védare, 'ndemo a védare”

Veneto2, Andrea: Oh ma gaveo fato un beo numero de gente cua! Bon dai, ve lassemo lavorar cua che sié già bastansa!

Veneto1, Patrizia: Eh però noi cua avemo da passar! Cavé tuta sta roba da meso!

(vers le parade de material nta mez a la strada)

Piodeghèr4, Tomas: Fegurasse! Chesta no se la toca! Meti che retaca a tampestà e la se mola da nof, fenis tut inte le case!

Veneto2, Andrea: Aaahhh… và ben (auna). E che strada femo ciò par rivar a Taibon?

Piodeghèr1, Daniel: Torné ndrio e ciapé la tangenzial!

Veneto2, Andrea: Grassie ciò, se vedemo e bon lavoro!

Veneto3, Basso: Svelti! Che se taca a piovare, se slonga la damigiana del proseco, la gavemo lassada verta”

El reinterven el Giacomo e l descrif la situazion, l atenzion la se tramuda sul car “Ostaria da Ciana”.

Giacomo: Eh, no tuti, ma zerta dent la ne parea che la fusesse n gita… tuti esaltadi…

Po nsoma podea ndà pedo… vers le undese lassù n zima pian pianet sion rivai a descastrà fora dai sas la gradela dei Font, e co l era medanot la avea belche fenì el pitrop de venì do per strada.

Davide: Ah bon bon… manco mal… e tasi che no l s à destacà e no l v à rodolà do en crodolon dai Cadinei⁷… Ma in Comun avaieo ciamà? Erelo calchidun?

Tuti: Booohhh!

L passa l Patrick sosia-Tecia co “tuta anfibia professionale” sun la “fat bike” zigan:

- Oh sta tuta! Come che la cen la piova, come che la cen la piova!”

Davide: El sindico èrelo onde? L avaieo vist voialtri?

Sponta fora el sindico Sisto coi pompier che i lo cen per le spale, per i braz.

Sindico Sisto Da Roit: Aiuto! Sono trattenuto dai pompieri!!

L scomenzia a descore l Liam e l descrif Parech e Val de Frela. I taca a se move i ator del car “Val de Frela”.

Liam: Per no parlà de come che la era metesta Parech! Giara e palta dapartut! Fà cont, l pra sora casa mea l era deventà tuta na pissa! Manchea solche i pes a saltà fora dal taren!

Manuel: Eh te crede! L pont sun Val de Frela el s avea belche incucà! L era vegnest do na boa là da le Roaze, i le ciamarà cossita per valch! Doi pez i à sfrandest tuta la tera e la giara sot al pont e l acua no la é pi stada bona de ndà do per el sò sgrassol e i se l à recatà meda in mez ai termen e meda inte per le case de Parech!

Liam: M à rivà tochetoi de stradon inte per porta! Bisognea anca tirà ia l acua cande che la rivea do oviamente… e mi ere là co na scoa nte man e co le tonade che le ilumenea l taren e ris-cee anca na folgorazion! E ti Manuel marti 30 bonora no t era anca passà a vede tut el tafat?!

Manuel: Eh si! Dovee ndà su a Farénzena a ció n generator… olee ndà su co la machina e è fat el viaz su per Parech e per la Lobia, l era n ru de acua che corea do per strada. Son rivà su sot a la casa del Tita e è catà el Rica che vegnia do, è tirà dabas el fenestrin e gh aee domandà se se podea ardonde Farenzena co la machina… el l me responz: “Mah no sè… la é n cin cossita, la strada”.. alora mi nte l dubio è assà l auto nte n parchegio là vesin… cande che son ndat su… è vist mi come che la era la “strada”… l acua la se l avea magnada tuta! Gnanca co n gipon no sarie nò ndat su da cuant che la era desfada e masenada!

Davide: Iesomarènde! Erié tornai coi troi de na olta! Eh mi ve dighe, el mercol 31 co son rivà dal driomeodì, son desmontà da la coriera, me son calumà en cin da dintorn, e è vist tut sto desio de taie e de alber capotai sora Farenzena e da le bande! Ma, e voi aveo abù tant dani nte i vos taren?

Alex: Ih grazie! Su a le Buse a Farenzena no aon gnanca pi n alber in pie; tuti l se li à tiradi do el vent! Inmancol i fussesse tuti bei per dret e apede strada, nò! L à fat tut en safasson! Tut incrosà e s-cencà! I n avea contà che i avarae scominzià a netà fora da cua a poch temp… ma ali fat valch? Percheche mi no me son inascort…

Giacomo: Giusta chei pi nta mez a le bale i s à ciot su, tant l é che l pont su la Campregana ades l é normal e ben net… Pensete che avaion tute le telecamere pontade su de noi! Da la Rai al Tgcom de Berlusconi! E rengrazion el ziel che per na olta no i s à sbalià a dì che se era a Cortina!

[Flashback 2] Canzoneta da telegiornal. La scomenzia la seneta co intervista del “giornalista romano” sul car “pont de Val de Frela”.

Talian, Nicolas: Sì, sì siamo qui in Véneto, nel comune di Agòrdo, prescisamente in località Val di Fréla, sotto l’abitato di Farenzèna, dove possiamo vedé i danni causati dalla furia dell’acqua, e abbiamo qui una ragazza der loco che sce vole porta’ la sua testimonianza. Sce stanno molte persone qua, allora sce dica, che state a fa’?

Tosata, Martina: Ma l me scolte, come che l pol vede, cua aon fat tut en dret da ngeri da sera a zercà de cenì la brentana e che no la fesse come nte l ‘66! La situazion la é che sta boa nova la n à blocà l pont e l acua la à scomenzià a core inte par sot a strada e la à scavezà e tirà su tut l asfalt.

Ades l temp l s à n cin chietà..

Talian, Nicolas: Ma è vero che scè stato tanto vento?!

Tosata, Martina: Ma secondo ti? Te pol dilo! Aee l cuert tut che sgorlea, le scurete e i barcoi che se verdea fora, i cop che svolea da tute le bande… se sentia perfin i alber e le rame che se sbreghea da cuant che l sofiea sto ventoz!

Talian, Nicolas: Ma giù a monte, dov’è andata tutta quest’acqua?

Tosata, Martina: Ma onde ostu che la sie ndata? Te na secia?

Talianaz, Nicolas: Seriamente?

Tosata, Martina: L aon parada in do co le scoe e la sarà rivada inte Cordegol..!

Talianaz, Nicolas: Ma in tutto sciò, in muniscipio avevate chiamato?

L passa l Patrick sosia-Tecia co “tuta anfibia professionale” sun la “fat bike” zigan:

-Oh sta tuta! Come che la cen la piova, come che la cen la piova!”

Talianaz, Nicolas: Il sindaco dov’era?

Sponta fora el sindaco Sisto coi pompier che i lo cen per le spale, per i braz.

Sindaco Sisto Da Roit: Aiuto! Sono trattenuto dai pompieri!!

Talianaz, Nicolas: Aahnn...’a bbene grazie mille, sci ritroviamo tra poco per altre notizie sull’emergenza maltempo nelle Dolomiti, a voi la linea a studio!

L atenzion de la sena la se mof da nof sun “Ostaria da Ciana”.

Liam: Nsoma en bel casin ah?

Giacomo: Eh... anca sta olta on doest se rangià noi…

Alex: Eh da che mondo è mondo l é semper stat cossì, ma l “lato positivo” l é che la fà vegnì fora la comunanza nte l emergenza!

Manuel: Eh, no solche nte l emergenza, ades ocorarà pensà de sistemà chel che vanza de sti bosch...!

Davide: Osti, aé reson… v aé propio passà el diaol e pedo voi… maaa per el tema del car da Le Vile de Vecia Popa de chest an, a la fin… fone che?

FIN

¹ Sorainom de chei da La Val/La Valle Agordina; l é famos el campanilism anter Agort e La Val.

² Piciola val che da sot el Framont la fenis te la frazion de Tócol.

³ Piciol ru afluent del Cordegol, che l scor a la sò man zanca orografica, l passa per le frazioi de Val de Frela, Parech e Prompicai.

⁴ “Servizio di Prevenzione e Sicurezza negli Ambienti di Lavoro”.

⁵ Sorainom del tecnich comunal de Agort, famos a Le Vile per ndà a stroz co na “fat bike”.

6 Piciola val che dal Col del Diegol la fenis te la Campregana a l alteza de Val de Frela.

⁷ Referiment al gran cròdol cascà a Bries schizan n auto ai 2 de faurèr del 2019.