I prime dis de otobre l è ruada na bruta nuoa a San Vido. Gianni Bonafede, che l stasea in Germania da an grun de anes, l é se n dù, a novantassié anes.
Sabrina Menegus - Gianni Bonafede, guida alpina
Bonafede l era nassù a Fiesso d’Artico, paes de la riviera del Brenta. Can che l aea cuatro anes, la so famea l é caminada da la provinzia de Venezia e la s à tramudà a San Vido, agnó che ancora ades vive doi dei so fradiei e i so nevode.
Ia par al 1948 l é deventà guida alpina, e l é stà par anes ize l Socorso alpino de San Vido.
Ize la so vita da alpinista se pó intuì la passion che l aea par la crodes de ciasa soa, agnó che l à verto an grun de vies. Intrà l 1947 e l 1951 l à ciatà fora percorse nuoe, intrà l 2° e l 6° grado, sul Corno del Doge, su la Croda del Beco, su l Albamaria, sul Tor e sul Sorapis. I so conpagne ize chesta inpreses i è stade alpiniste da San Vido, e l famoso Severino Casara, personaio che l à aù par duta la so vita n amor par la crodes del Cadore.
Intrà duto chel che l à fato can che l era a San Vido, in tante i se pensa che l è stà un de chi de la spedizion del setenbre del 1949, betuda in pè da la sozietà sportiva Caprioli, par portà in zima a l Antelou la statua de la Madona che se ciata ancora ades.
(San Vido)
Pubblicato il: Martedì, 26 Novembre 2019
