29 otobre 2018
Anonimo (poesia)
Tira an vent che fà paura
piove forte e par straèrs
par Belùn la é proprio dura
sia tel pian che sul revès
Al Comelico in denòcio
l’Agordin anca de pi
su l Ampezo buta an ocio
l é un disastro mai finì
Del Feltrin no ston parlar
la cità l é martoriada
te gnen sol da bestemar
co te vede la Culiada
Pai da luce intortoladi
strade rote o anca destrute
pez e lares intassadi
le avon viste cuasi tute
Pora gente anca isolada
senza acua e da magnar
cuasi gnanca i te dà bada
i à l orgolio da mostrar!
Tira an vent che fà paura
piove forte e par straèrs
co se rabia la natura
ston trancuili …on senpre pers!
(Belun)
Pubblicato il: Mercoledì, 27 Novembre 2019
