De Celso Degasper Meneguto (Anpezo 1903-84, guida dal 1922) ei pi de un recordo; ma de un no me desmenteo, e l conto senpre vorentiera a ci che no sà. Se jea d auton del 1976: 'sie ancora a scora e col mè amigo Zesare Dipol Molina pariciaon, duta ra seres, par Radio Cortina na oreta de musica e paroles par anpezan, che r aea gnon “Cuatro ciacoles pede el fornel” e ra scomenzaa co na sonada de Mozart.

Iusto par fei algo de noo, m aee inventà de tuoi ‘sò, inze ra ciases o là da Radio Cortina (che r ea logada su in Stazion, agnoche ancuoi l é i ufizie de Cortina Marketing), ra ojes de anpezane pi o manco vece, che i aea algo da dì: artejane, femenes de ciasa, guardiacaza, guides, maestre de schie, pastore...

'Sà che ormai inalora me saea beles ra stories de ra guides, soralduto de cheres che es 'sia in croda trenta, cuaranta o zincuanta ane ignante, e posto che con el aee nafré de confidenza, i ei domandà a Celso se l aea chera de me contà algo dei sò cuaranta e passa ane de laoro.

El Meneguto l ea un òn de ra leje e i saea bel ciacolà co ra 'sente; da poco pi de un an l ea restà solo e l stentaa co ra janbes, coscita - na sera de noenbre - on stà a l ciatà fora dai Menegute a Bigontina. M aee tolesc drio un rejistrator de chi che doraon inalora, na cassetina da 45 menute e un sfoi con su dodesc domandes, e aon scomenzà a ciacolà de crodes e de guides.

Ciacolea che te ciacolea, canche ei fenì ra seconda domanda m ei inacorto che l ea fenì anche ra cassetina: tre cuarte d ora solo pa ra prima does, e in aarae abù outres diesc... M à tocià i dì a Celso che aon da ra fenì là, e aasson mangare podù tornà un outro dì: in chera, mese inbramide parceche l fornel de stua l ea studà, Celso l s à pensà che el no n aea betù fora nuia da bee, e l m à domandà se aon acaro de un goto de ros.

No n on podù refudà: on beù de oga el vin deboto jazà, on betù via rejistrator e cassetina e de l indoman r intervista se r à scotada par el radio. Canche Radio Cortina ra s à tramudà, ignante a Villa Alessandra epò là pede ra calonega, l é ‘sù strazà tanto, e inze par meso anche ra nostra cassetina co ra osc del Meneguto.

L é passà ormai cuarantatré ane, Celso l é morto da pi de trenta, ma chera sera fieda de noenbre fora da el a Bigontina, Zesare e ió se ra penson ancora ades!