Istituto Ladin de la Dolomites

L Istituto, fin da can che l é stà betù in pe, al s à dà da fai par parecià an strumento de laoro compain par la trascrizion de duta la variantes de ladin dei comunes de la provinzia de Belun. La ativitas che l Istituto l fas cume consulente les è, de fato, la corezion de teste nuoe o la trascrizion de scrite bele fate. L Istituto al laora anche par formà ci che scrie par ladin, de modo che i vade a ora a dorà la regoles de la scritura cognossuda da dute cume “grafia dell’Istituto”. Chi che laora in Istituto, da spes, ciata soluziones par chi che scrie par ladin, adiade dai vocabolarie ladine che i é cenude ize la biblioteca a Borcia.

N outro mestier che ien fato da l Istituto de Borcia, soralduto considerà l laoro che go esse dos, l é la trascrizion e la divulgazion de la operes pì grandes, e senpre pi da spes, la riproduzion de libre e outre scrite par beteli in internet, cume, par esempio, i vocabolarie.

An grun inportante l é l laoro che l Istituto l fas par i Comunes, can che i decide de fai i cartiei su la strades dei paes par talian e ladin; i esperte de l Istituto i controla la propostes de traduzion e i bete a posto la formes de trascrizion.

Fai nasse n lessico nuoo l é difizile ize la pratica par pì de n motivo. Un de cheste l é che sul teritorio l é poca tradizion ize chesto ramo, furse parché la parlada ladina l é stada dorada solo ize i ultime anes par chel che l à a ce fai co la vita publica. N outra reson l é anche de zercà ize l teritorio, che l é gran e l ciapa ize tante luoghe e comunitas diverses. L é evidente che l see ben pi fazile pensà a soluziones par an teritorio pì unì e che l aibe an numero pi bas de comunes, cume la Val de Fassa, confronto a n area fata de 34 comunes che storicamente i fas parte de ambite amministrative diverse, cume che l é de fato l teritorio agnó che l laora l Istituto Ladin de la Dolomites.