Nona Rita de 91 ane la me conta...

“L era cuasi medanuote canche son duda su in sofita par me ciatà vargo che me puodesse dì ben come sacoza nuova. In chel dì a scola la mea la s avea roto del duto parché l era vecia, e no m era gnanche passà par la mente de in domandà una nuova a ma Mare. Inze ciasa no aveone massa roba, ma lassù inze chel salfasson, seguramente vargo avarae ciatà. E di fati dapò avè ben sgorlà su la strazes che l era in su là, ei ciatà na bela borsa granda del nono!

L indoman duta contenta son duda a scola cu la me sacoza, ma come che i m à vedù ruà, dute i riede i à tacà a me menà in giro: -Varda varda Rita che l à al baul! Varda varda Rita che l à al baùl!- e i ridea come mate!

An tin do de moral an tin inrabiada vado inze classe e me sento do sul me bancheto, scondendo sote tola la borsa del nono. De là de n tin vien inze la maestra: -Incuoi don inze piaza a fei ginastica. Beteve corèn in fila. Rita tu te sos la caposcuadra dei Balilla de la riedes, e tu Rino chel de i riede!- No me parea vero: ió la caposcuadra!

Fei la caposcuadra l era na roba importante, e te l puodees fei solo se te eres veramente brao in ginastica. Bisognaa se bete dute in fila e seguì na serie de esercizie dute a ritmo e senza se sbaglià de n movimento. La maestra la stasea da na parte e la vardaa che te fasesses duto polito. Guai se te sbaliaes vargo! Se soziedea, la te betea in punizion daòs a la lavagna cu la giara sote i denoge o la te dasea do par le man cu la bacheta.

Canche on fenì de fei i nostre esercizie inze piaza, son tornade su a scola pian pianin a pè. La maestra la n à betù in fila davante ala porta e, come sempre prima de dì a ciasa, la n à dà an sculier de oio de merluze, par ne rinforzà e ne tirà su. (No digo che l fusse pedo del oio de rizino ma...mare mea che tristo che l era! Al te fasea vegnì da voltà su!). E dapò la n à dà al puntegio de la ginastica.

M ei cuasi betù a piande canche la m à dito che aveo al puntegio pì auto de dute. Chesta roba la m à fato in bota desmenteà dei scherze e de le umiliazion de in chela bonora . De corsa e piena de sodisfazion, son duda inze classe, m ei tolés la me sacoza da sote tola e son duda a ciasa contenta come na pasca!”

(Zubiana, Menzione speciale Prosa)